Á morgun, miðvikudag verður 1288. fundur í bæjarráði Grindavíkur. Eftirfarandi er dagskrá fundarins:

Almenn erindi
1.	1111108 – Ársreikningur 2011, Grindavíkurbær og stofnanir
	Ársreikningur lagður fram til afgreiðslu í bæjarráði.
2.	1204034 – Frumvarp að úthlutunargerð  vegna nauðungarsölu
	Úthlutun söluandvirðis vegna Leynisbrautar 13c, 209-1855
3.	1203099 – Beiðni um umsögn frá  Atvinnuveganefnd Alþingis um frumvarp til laga um stjórn fiskveiða (heildarlög), 657. mál.
	Tillaga að umsögn lögð  fram.
4.	1204004 – Beiðni um umsögn frá  Atvinnuveganefnd Alþingis um frumvarp til laga um veiðigjöld (heildarlög), 658. mál.
	Tillaga að umsögn lögð fram. Sú sama og er við hitt frumvarpið
5.	1204018 – Stangaveiðifélag Hafnarfjarðar sækir um styrk til að standa straum af fasteignagjöldum.
6.	1204025 – Tilboð dýpkun í Grindavíkurhöfn 2012.
	Tilboð lagt fram ásamt tillögu hafnarstjórnar.
7.	1010085 – Bygging reiðhallar í Grindavík
	Undirritaður samningur lagður fram
8.	1204032 – Reglur um aðkomu Grindavíkurbæjar að atvinnuuppbyggingu.
	Yfirfara gildandi reglur og meta hvort þær þurfi breytinga við. Sjá  á vef http://www.grindavik.is/atvinnuuppbygging
9.	1203063 – Aðalfundur Eignarhaldsfélags Suðurnesja hf. 2012
	Ársreikningur lagður fram til upplýsingar. Grindavíkurbær á 2,774% hlut í félaginu.
10.	1001009 – Sameignarsamningur að  óskiptu landi Jarngerðastaða og Hópstorfu.
	Sameignarsamningur tilbúinn. Veita bæjarstjóra heimild til að kaupa hluti smærri hluthafa á móti HS orku.
11.	1204020 – Arðgreiðsla Lánasjóðs sveitarfélaga ohf.vegna ársins 2011.
12.	1002021 – Framtíðaruppbygging íþróttamannvirkja.
	Niðurstöður verðkönnunar.
13.	1109058 – Úttekt á Grunnskóla Grindavíkur haustið 2011.
	Skipa vinnuhóp til að vinna úrbótaáætlun. Tillaga skólaskrifstofuVinnuhópur vegna almennrar úttektar:1. Fulltr. skólaskrifstofu: Nökkvi Már Jónsson 2. Fulltr. fræðslunefndar: Klara Halldórsdóttir3. Fulltr. stjórnenda: Halldóra Kr. Magnúsdóttir, skólastjóri4. Bæjarstjóri5. Fulltr. foreldra: Tilnefndur af foreldrafélaginu6. Fulltr. kennara: Tilnefndur af kennurum7. Bæjarfulltrúi: tilnefndur af bæjarráði
14.	1204009 – Málefni einstakra nemenda með sérþarfir í Grunnskóla Grindavíkur
	Skipa vinnuhóp til að vinna úrbótaáætlun. Tillaga skólaskrifstofuVinnuhópur vegna nemenda með sérþarfir:1. Fulltr. skólaskrifstofu: Bjarnfríður Jónsdóttir2. Fulltr. fræðslunefndar: Þórunn Svava Róbertsdóttir3. Fulltr. stjórnenda grunnskóla: skv tilnefningu
15.	1203080 – Göngustígur meðfram Austurvegi að Þórkötlustaðarhverfi
16.	1203081 – Göngu- og hjólastígur meðfram Grindavíkurvegi að Selskóg
17.	1204038 – Stofnaðild að Þekkingarsetri Suðurnesja.

Félagsheimilið Festi var aftur sett á sölu í mars þegar ljóst var að tilvonandi kaupendur fengu ekki alla þá fjármögnun sem þurfti til að hægt væri að ganga frá samningum. Kaupverðið á Festi var 15 milljónir og 100 þúsund. Mikið var þrýst á um að auglýsa Festi aftur þegar þær forsendubreytingar urðu að ekki þyrfti að vera samkomusalur til staðar í húsinu.  Þá fullyrtu margir að Festi væri mun verðmætara og víst öruggt að það kæmu hærri tilboð.

Þegar fresturinn til að leggja fram tilboð að nýju í Festi, rann út,  höfðu engin tilboð borist. Eftir að fresturinn rann út kom eitt tilboð sem var mun lægra 15 milljónir.

Stjórn Festis hefur hist einu sinni eftir að tilboðsfrestur rann út. Það er mat undirritaðrar sem situr í þeirri stjórn að reyna ætti að semja við þá sem upphaflega buðu í húsið og hafa unnið að því að fá fjármagn og leigjendur, með fullmótaðar og góðar hugmyndir um hvernig húsið komi til með að þjóna íbúum bæjarins. Samið yrði þá væntanlega á þeim forsendum að lánað yrði fyrir kaupverðinu á húsinu en  það ekki staðgreitt eins og áður var farið fram á. Spurningin er hvort það nægi til að brúa bilið?

Ljóst er að Grindavíkurbær hefur ekki fjárhagslegt bolmagn að gera Festi upp og reka það í kjölfarið á sama tíma og unnið er að því að byggja upp nýtt íþróttamannvirki. Hugmyndin er að íþróttamannvirkið  þjóni öllum íbúum  auk þess sem þar á að vera samkomusalur fyrir bæjarbúa.

Kristín María Birgisdóttir

Oddviti Lista Grindvíkinga

Sveitarfélögin setja reglur um NPA

Til stendur að innleiða notendastýrða persónulega aðstoð við fatlað fólk á markvissan og árangursríkan hátt. Verkefnisstjórn var skipuð í samræmi við bráðabirgðaákvæði í lögum um málefni fatlaðs fólks nr. 59/1992 sem tók gildi 1. janúar 2012, samhliða ýmsum öðrum breytingum á lögunum vegna ákvörðunar um flutning ábyrgðar á þjónustu við fatlað fólk frá ríki til sveitarfélaga.

Sveitarfélögum er heimilt að verðmeta einstaka þjónustuþætti í gjaldskrá. Sveitarfélög skulu síðan gera notendasamninga um NPA við hvern notanda eða aðila sem kemur fram fyrir hönd hans þar sem fram kemur hvaða þjónustu hlutaðeigandi þarf á að halda í daglegu lífi og verðmat þjónustunnar. Sveitarfélögum er heimilt að ráðstafa þeim fjármunum sem svara til kostnaðar vegna þjónustu hvers notanda sem veitt er á grundvelli notendasamnings um notendastýrða persónulega aðstoð til notandans með þeim hætti sem ákveðið er í notendasamningnum.

Verkefnisstjórnin hefur tekið saman handbók um NPA sem er ætlað að gagnast sveitarfélögum, notendum, ríkisstofnunum og öðrum þjónustuaðilum við framkvæmd þróunarverkefnisins sem nokkurs konar rammi um fyrirkomulag þess.

Næsti liður þróunarverkefnisins er að sveitarfélög setji sér sjálf reglur um það hvernig veita skuli NPA á grundvelli handbókarinnar en slíkar reglur eru forsenda fyrir því að NPA-samningar verði gerðir. Sveitarfélög geta sameinast um setningu slíkra reglna innan þjónustusvæðis. Verkefnisstjórnin mun gefa út leiðbeiningar um form slíkra reglna sem vonir standa til að sveitarfélögin geti nýtt sér.

Mikilvægt er að hafa í huga að ekki er gert ráð fyrir að NPA verði lögbundin þjónusta fyrr en í lok árs 2014. Engu sveitarfélagi er því lagalega skylt að veita NPA fyrr en þá. Rík áhersla er þó lögð á það af hálfu verkefnisstjórnarinnar að sem flest sveitarfélög taki þátt í þróun verkefnisins um innleiðingu þessa þjónustuforms.

Bæði á landsþingi Sambandi íslenskra sveitarfélaga í síðasta mánuði og á auka aðalfundi SSS (Sambandi sveitarfélaga á Suðurnesjum) þann 13. apríl var mikið rætt um þess þjónustu. Það verða því verðug verkefni sem bíða SSS að komast að samkomulagi um hvernig framsetning þessarar þjónustu verður hér á Suðurnesjum. Við erum bjartsýn í Grindavík að þjónustan við fatlaða einstaklinga verði betri og þægilegri með tilkomu NPA.

Á aðalfundi Lista Grindvíkinga, sem fram fór á dögunum var ný stjórn kjörinn. Formaður listans er Lovísa Hilmarsdóttir, Pétur Benediktsson er varaformaður, Dagbjartur Willdardsson gjaldkeri, Kristín María Birgisdóttir ritari og Gunnþór Sigurgeirsson er meðstjórnandi.

G-listinn vill minna bæjarbúa á vefsíðu sína, www.glistinn.is

Allir eru velkomnir að taka þátt í starfinu. Félagsfundir verða auglýstir á vefsíðu G-listans.

Stjórnin

Aðalfundur Lista Grindvíkinga verður haldinn næstkomandi fimmtudag, 1. desember kl. 20:00  á  efri hæð Salthússins. Heitt verður á könnunni.

Á dagskrá verða venjuleg aðalfundarstörf.

Þeir bæjarbúar sem hafa áhuga á að taka þátt í starfi G-listans eru hvattir til að mæta.

Kaup á bæjarstjórabústað verða að veruleika

Grindavíkurbæ var boðið hús á besta stað í bænum til langtímaleigu. Meirihluti  bæjarstjórnar upplýsti G-listann aldrei um það tilboð og ákvað að hundsa boðið.  Meirihlutinn ákvað að fjárfesta í nýbyggingu án útboðs. Engum grindvískum verktaka var boðið að koma með tilboð.

Um miðjan september samþykkti meirihluti bæjarráðs að gera tilboð í fasteign sem ætluð yrði sem bæjarstjórabústaður. G-listinn mótmælti því harðlega og benti á að slíkt tilheyrði gömlum tímum. Þegar ráðinn var nýr bæjarstjóri var það skilyrði að hann myndi búa í sveitarfélaginu. Í 7.gr ráðningarsamningsins var því sett ákvæði þar sem bæjarsjóður skyldi greiða leigu af húsnæðinu. Hvergi kom fram og aldrei var rætt um að fjáfesta í nýju húsi.

Það er mat G-listans að á meðan verið er að koma rekstri bæjarins í jafnvægi með gjaldskrárhækkunum, hækkun á fasteignagjöldum og samdrætti í þjónustu að þá eigi ekki að auka við reksturinn með kaupum á nýju húsi.

Rök meirihlutans hafa verið margvísleg fyrir húsakaupunum. Ein eru þau að við séum að spara með því að kaupa hús. Þau rök ganga upp ef ætlunin er að leigja til frambúðar bæjarstjórabústað. G-listinn er á því að þegar gerður verður nýr samningur fyrir næsta kjörtímabil, hver svo sem kann að verða bæjarstjóri, þá eigi að sjálfsögðu að semja á þeim forsendum að hann sjái um sitt húsnæði sjálfur eins og annað starfsfólk bæjarins. Hvort sem hann kýs að kaupa sér fasteign eða leigja.

Fjármagnið sem nota á til kaupanna er  svokallaður ,,ágóði” af sölu síðasta bæjarstjórahúss. Vert er að minnast þess að bæjarfélagið tapaði um 17 milljónum á þeim samningi. Þá má líka geta þess að þegar ákveðið var að kaupa húsagrunn við Austurhóp af Sparra ehf var engum verktaka í Grindavík boðið að koma með tilboð. Í staðinn ákveður meirihluti bæjarstjórnar með stuðningi Samfylkingarinnar að ganga til samninga við verktaka sem kemur úr Njarðvík og nýtir sé enga þjónustu grindvískra iðnaðarmanna.

Það sem vekur upp fjölda spurninga um hvaða hagsmunir liggi að baki  kaupunum er sú staðreynd að sveitarfélaginu bauðst hús til leigu út kjörtímabilið. Meirihlutinn sá enga ástæðu til að upplýsa minnihlutann um að íbúi í Grindavík, sem á stórfína húseign bauðst til að leigja bænum húsið fyrir bæjarstjóra og hans fjölskyldu, ásamt því að gera á því þær lagfæringar sem þyrfti. Þegar bæjarfulltrúi G-lista hafði samband við manninn til að fá þetta staðfest hafði hann ekkert heyrt frá meirihlutanum.

G-listinn harmar að þessi niðurstaða skuli hafa orðið ofan á, sérstaklega í ljósi þess að mun farsælli lausn var í sjónmáli. Sú lausn hefði komið til móts við kröfur íbúa ásamt því að leysa húsnæðisóvissu bæjarstjóra.

Tekin verður ákvörðun um kaup á nýju bæjarstjórahúsi á næsta bæjarstjórnarfundi sem verður miðvikudaginn, 26. október kl.17:00. Fundurinn er að sjálfsögðu opinn öllum bæjarbúum.

 Á fundi bæjarráðs fyrr í dag var samþykkt að gera tilboð í fasteign sem ætluð verður sem bæjarstjórabústaður. G-listinn kom með tillögu um að leigja áfram út kjörtímabilið og semja í framtíðinni við bæjarstjóra á þeim forsendum að ekki verði til staðar bæjarstjórabústaður í eigu bæjarins fyrir viðkomandi að búa í. Sú bókun og tillaga sem G-listinn lagði fram var svohljóðandi:

G-listinn mótmælir því harðlega að keypt verði nýr bæjarstjórabústaður. Slíkir tilburðir tilheyra gömlum tímum auk þess sem upphaflega stóð til að leigja hús. Það er í raun hræsni að á meðan verið er að skera niður þjónustu og selja í burtu fasteignir til að lækka rekstrarkostnað, sbr. Festi að þá skuli á sama tíma bæjarfélagið vera að auka hann með kaupum á bæjarstjórahúsi. Það er mat okkar að eftir að síðasta bæjarstjórahús var selt með gríðarlegu tapi hefði bærinn átt að láta slíkar fjárfestingar eiga sig og semja við bæjarstjóra á þeim forsendum að leigja þurfi hús á almennum markaði. Það var skilningur bæjarfulltrúa G-listans að leigja ætti hús en ekki fjárfesta í nýju. Kostnaður við húsaleiguna út kjörtímabilið er minni en kaup á nýju húsi auk viðhaldskostnaðar.  G-listinn óskar því eftir því að ákvörðun um kaup á bæjarstjórabústað verði dregin til baka.

Tillagan var felld með 2 atkvæðum gegn 1 og lagði meirihluti B og D lista fram eftirfarandi bókun:

Bæjarfulltrúar D- og B lista vilja benda bæjarfulltrúa G-lista á að ráðningarsamningur bæjarstjóra var samþykktur af öllum bæjarfulltrúum á bæjarstjórnarfundi og var öllum ljóst á þeim fundi að til stóð að nota húsnæði fyrrverandi bæjarstjóra sem bæjarstjórabústsað ef það seldist ekki, skoða leigumöguleika eða kaupa annað hús. Húsnæði fyrri bæjarstjóra var selt þar sem til bæjarins voru að flytja nýjir einstaklingar. Varðandi leigu á húsnæði kom í ljós strax í upphafi að enginn áhugi var að leiga til bæjarins húsnæði út kjörtímabilið en allir bæjarfulltrúar gerðu sér grein fyrir því að ekki væri hægt að bjóða bæjarstjóra ásamt hans fjölskyldu upp á flytja oft yfir kjörtímabilið. Þá var eini kosturinn sem eftir er að kaupa hús. Verið er að skoða húsnæði sem er í svipuðu eða lærra verðbili en fékkst fyrir fyrra bæjarstjórahús. Vert er að minna á að fulltrúar G-lista samþykktu ráðningarsamninginn auk þess sem fulltrúi G-lista í bæjarráði samþykkti að auglýsa eftir húsnæði. Er því ljóst að um mikla stefnubreytingu hjá fulltrúum G-lista er að ræða.

Varðandi rökin með því að bæjarfélagið kaupi hús fyrir bæjarstjóra þá er slík algengt meðal sveitarfélaga á Íslandi. Laun bæjarstjóra tóku mið að því að húsnæði væri innifalið í þeim launakjörum og eru því lærri en í nágrannasveitarfélögum og sambærilegum sveitarfélögum á landinu. Starfsöryggi bæjarstjóra er annað en hjá almennum launþegum og líkt og verið hefur í Grindavík síðustu ár þá hefur það starfsöryggi verið lítið. Að auki er ekki lengur í ráðningasamningi bæjarstjóra eins og var áður að hann fái laun út kjörtímabilið verði honum sagt upp. Mun hagstæðara er fyrir bæjarfélagið að eiga hús og annað hvort greiða lærri laun til bæjarstjóra eða leiga beint til bæjarstjóra.

Fulltrúar D- og B lista.

Aftur bókaði G-listinn:

Það er mat bæjarfulltrúa G-lista að stjórnmálamenn mega aldrei verða of góðir fyrir stefnubreytingu í þeim málum sem kunna að koma inn á borð til þeirra. Í 7. gr. ráðningarsamnings við bæjarstjóra segir „Bæjarsjóður mun greiða leigu af húsnæði fyrir bæjarstjóra. Bæjarstjóri mun sjá um almennan rekstur.“ Það stendur því hvergi að kaupa þyrfti hús. Þessar hugmyndir voru ræddar og samþykkti bæjarfulltrúi G-lista að auglýsa ætti eftir húsi. Eftir frekari umræður bæði við bakland sem aðra þótti G-listanum þessi hugmynd röng. Það er mat okkar að farsælla sé að klára ráðningartíma bæjarstjóra með því að leigja áfram hús. Famvegis ætti það þó að vera stefna bæjarins að vera ekki með sérstakt húsnæði bæjarstjóra. Þeir sem koma til með að ráða sig í starf bæjarstjóra í Grindavík í framtíðinni, vita þá að húsnæði þurfa þeir að leigja á almennum markaði eða fjárfesta í sínu eigin.  Það þarf ekki að þýða að hingað fáist ekki faglegir og hæfir bæjarstjórar.

Bæjarfulltrúi S-lista tók undir málstað meirihlutans og bókaði eftirfarandi:

Fulltrúi S-lista tekur undir tillögu meirihlutans hvað varðar lausn á húsnæðismálum bæjarstjóra, það var skýlaus krafa að bæjarstjóri skyldi vera búsettur í bæjarfélaginu og í samningi við bæjarstjóra er ákvæði um að bærinn leigi húsnæði fyrir hann. Það er ekki heiglum hent að fá leigt húsnæði til fjögurra ára og ekki er hægt að bjóða fólki upp á stöðuga óvissu í húsnæðismálum. Því samþykkir fulltrúi S- listans að fjármálastjóra verði falið að gera tilboð í húsnæði til framtíðar og þessi mál leysist svo sómi sé af fyrir Grindavík.

Að þessu sögðu er ljóst að kaup á nýju bæjarstjórahúsi er því miður staðreynd. Við megum ekki gleyma því að kaup á húsnæði fyrir bæjarstjóra snýst ekki eingöngu um krónutölur. Við þurfum að marka okkur stefnu til framtíðar um hvernig þessum málum skuli háttað. Auðvitað verður aldrei úr því dregið að starf bæjarstjóra er ótraust og oft háð meirihlutaskiptum hver verður ráðinn bæjarstjóri eða hver fær að fjúka. Ég vil hins vegar trúa því að bæjarstjórastöður tilheyri ekki lengur pólitískum bitlingum og að framvegis verði þeir ráðnir á faglegum forsendum líkt og við gerðum nú. Verði það gert og hafi komandi bæjarstjórnir hagsmuni íbúanna raunverulega fyrir brjósti munu þeir áfram verða ráðnir af mikilli kostgæfni. Þá á það engu máli að skipta hvaða flokkar fara með meirihlutavöldin í bæjarfélaginu.

Kristín María Birgisdóttir

Oddviti Lista Grindvíkinga

Í síðustu viku samþykkti bæjarstjórn að stjórn Festis gengi til samninga við þá aðila sem buðu hæst í gamla félagsheimilið. Margir urðu ósáttir og létu í sér heyra. Aðrir fögnuðu því að niðurstaða væri í sjónmáli um hvað gera skyldi við þessa fyrrum menningarperlu Grindavíkur.

Frá því 2006 hefur húsið staðið autt og snautt. Festi hefur drabbast niður allt frá því húsið var vígt 1973. Eins glæsilegt og það var á þeim tíma er það í dag eingöngu útveggir með nelgt fyrir glugga. Virðing þeirra sem skemmtu sér við að níða húsið enn frekar var engin enda lítill sómi af húsinu undir það síðasta.

Mín fyrsta minning úr Festi var líklega bíóferð með bróður og frænda á Hans og Grétu. Ég hef ekki verið eldri en 5 ára, aðgöngumiði kostaði “einn grænan” og Festi því enn kornungt samkomuhús. Eftir það sótti ég árshátíðir skólans, sýndi leikrit, fór á jólaböll og aðrar samkomur. Festi er mér kært og ég á þar fjölmargar góðar og ljúfar minningar.

 Þetta er ekki í fyrsta sinn sem Festi er selt. Árið 2006 stóð til að “selja” húsið og byggja þar hótelturn – Festi var í rauninni gefið í það verkefni. Sú bæjarstjórn sem stóð að því tilkynnti stolt þann gjörning. Þá átti að selja Festi aftur 2007, rífa það og byggja hótelturn og nostalgíurökin sem uppi eru nú meðal íbúa um að fá að dansa aftur á balli í Festi fölnuðu í grafísku hönnunarmyndbandi sem sýndi það sem rísa skyldi.

 Það var ljóst í þeirri fjárhagsáætlanagerð sem G-listinn tók þátt í síðla árs 2010 að rekstur bæjarins væri ekki í jafnvægi. Margt kom þar til en augljós ástæða var að tekjur dugðu ekki fyrir gjöldum. Bærinn hafði nýverið tekið til rekstrar nýjan grunnskóla auk þess sem Saltfisksetrið var mjög dýrt í rekstri. Á þessu fjárhagsári fékk húsið 27 milljónir þar sem 10 milljónir áttu að fara í rekstur. Það dugði ekki til. Fólki var sagt upp og húsinu lokað yfir veturinn.

 G-listinn lagði upp með það loforð að styðja góð málefni sama hvaðan þau kæmu ef þau væru til þess fallin að þjóna hagsmunum bæjarbúa. Eftir að hafa metið kosti þess að fara sjálf í uppbyggingu á Festi eða bjóða það til sölu þótti okkur það vænlegri kostur svo lengi sem kaupendur hefðu fjármagn í að gera húsið upp. Okkur þótti sala á Festi þjóna hagsmunum íbúanna betur.

Þörf á samkomusal

 Eftir að Festi lokaði upplifðu bæjarbúar skort á samkomusal til að koma saman í gleði og sorg. Stórir salir voru til staðar við Bláa lónið og hjá Hitaveitunni en erfitt þótti að fara á milli auk þess sem leiga á slíkum sölum þótti dýr. Sú hugmynd hefur komið upp að byggja við íþróttahúsið og koma þannig til móts við smærri deildir sem hafa til fjölda ára mátt sætta sig við að æfa í anddyri hússins. Sá salur gæti nýst sem samkomusalur á kvöldin og þannig væri komin full nýting yfir daginn sem nauðsynlegt er til þess að salur reki sig. Innan þessarar byggingar fengju bæði UMFG og Kvenfélagið sitt rými líkt og til staðar var í Festi. Þessi hugmynd er góð.

Ef sveitarfélagið hefði farið sjálft í uppbyggingu á Festi hefði þurft að finna nýtingu á húsinu og var oft talað um að flytja þangað tónlistarskólann og bókasafnið. Skýrsla frá árinu 2004 sýnir að sá staður er ekki heppilegur því staðsetning á tónlistarskóla og bókasafni þótti best við grunnskólann við Ásabraut. Eftir stendur stjórnsýsla bæjarins sem nýverið hefur fengið aukið pláss í verslunarmiðstöðinni, en þær breytingar voru kostnaðarsamar. Að ákveða svo að flytja stjórnsýslu bæjarins í uppgert Festi er eins og löðrungur framan í bæjarbúa.

 Festi á gjafaverði

Hæsta tilboð í Festi var 15 milljónir. Mögum þykir sú tala lág og er ég því sammála. En eins og oft hefur verið rætt þá er verðmæti fólgið í því verði sem menn eru tilbúnir að greiða fyrir Festi. Allir gátu komið með tilboð í húsið enda var það vandlega auglýst til sölu. Þótt verðmæti hafi verði töluvert hærra þá var ljóst að það verð hefði aldrei fengist fyrir húsið. Það má heldur ekki gleyma því að þessar 15 milljónir eru ekki nóg – Það þarf hundruði milljóna til að gera húsið upp og koma því í rekstur. Kaupendur þurfa því einnig að ná töluverðri fjármögnun til að ljúka verkinu.

Loforð G-listans

Orðrétt segir í kosningaloforðum okkar um Festi: G-Listinn ætlar að gera upp Festi og tryggja að ytra útlit hússins haldist óbreytt. Við viljum að starfssemi þess verði með þeim hætti að húsið verði nýtt allt árið um kring.  Hér erum við ekkert að svíkja. Þeir aðilar sem hæst buðu í Festi ætla að halda ytra útliti þess áfram og því listaverki sem prýðir anddyrið. Þeir ætla að gera það upp og koma með verslunar – og þjónusturými sem klárlega mun þjóna íbúum allt árið um kring.

Hvers vegna ekki íbúakosning?

Þegar til tals kom stuttu eftir kosningar að selja Festi fór G-listinn vandlega yfir þær hugmyndir. Innan bæjarráðs stakk G-listinn upp á því að setja málið í íbúakosningu enda vildum við auka íbúalýðræðið í sveitarfélaginu. Ljóst var að kosningin gæti orðið dýr í framkvæmd og voru gróflega áætlaðar 1,5-2 milljónir í hana. Áfram héldu umræður um söluna, möguleika sveitarfélagsins að reka húsið og hvort bæjarbúar ættu að ákveða söluna. Niðurstaða var að við ættum ákvörðunina. Hún var langt í frá auðveld en við erum líka kosin til að taka erfiðar ákvarðanir. Við erum kosin til að kynna okkur málin út frá öllum hliðum sama hvað um ræðir. Okkur fannst í rauninni ekki hægt að láta kjósa um mál þar sem sá möguleiki að bæjarfélagið sæi um reksturinn myndi vera til staðar því það var útséð að Grindavíkurbær gæti ekki séð um húsið ef vel ætti að vera. Slík framkvæmd myndi óhjákvæmilega krefjast niðurskurðar annars staðar og eftir að hafa þurft að skera niður á þessu fjárhagsári þótti okkur slíkt algjörlega óviðunandi aftur. Bæjarfulltrúi D-lista leist illa á hugmynd um íbúalýðræði á þeim tíma sem G-listinn viðraði hana snemma árs. Hann var þó tilbúinn að stökkva á hana þegar ljóst var að hans hugmynd um endur-auglýsingu á Festi varð ekki ofan á. Þá reyndi hann heldur ekki að vinna henni brautargengi innan bæjarstjórnar með því að ræða hana við fulltrúa G og S-lista. Í staðinn kastaði hann henni fram, frekar vanhugsaðri, einn síns liðs. Það má vissulega færa fyrir því rök að auglýsa Festi aftur til sölu ef tilboð eru lág. Þá má líka rökstyðja endurauglýsingu þegar ákveðið var leyfa tilboðsaðilum að koma með frávikstilboð eftir að samkomusalnum var sleppt. Allir í bæjarstjórn voru sammála á þeim tíma að leyfa þeim tveimur sem buðu upphaflega að koma með tilboð. Ég er ekki svo viss um að önnur og mun hærri tilboð hefðu komið og jafnvel hefðum við miss þá aðila sem buðu upphaflega. Kannski að einhverjir hefðu boðið 2 -3 milljónum meira sem er í rauninni gróf ááætlaður kostnaður íbúakosningar. Að mínu mati er það ómetanlegt að þeir sem hæst buðu í Festi ætla að halda því í núverandi mynd að utan og þeim menningararfi sem prýðir andyrið. Einn þessara aðila sýndi húsinu á sínum tíma þá virðingu að mála það hvítt í skjóli nætur. Slíkur metnaður fyrir samkomuhúsinu er ekki sjálfgefinn og gott til þess að hugsa að heimamenn muni gera húsið upp, vonandi af metnaði og sóma. 

Við megum ekki gleyma því umhverfi sem við búum við í dag. Við megum ekki gleyma því að skorið hefur verið niður í íþróttastyrkjum til barna og ungmenna og búið er að hækka leikskóla- og fasteignagjöld bæjarbúa. Fólk hefur minna handa á milli og því forkastanlegt að fara að leggja auknar álögur á íbúa til að halda úti rekstri á Festi. Það er enginn sómi af því hvernig fyrrum bæjarstjórnir hafa hugsað um Festi. Líklega hafa þær frekar viljað eyða fjármunum í aðra þjónustu við íbúa en að halda húsinu við, enda er viðhald dýrt. Er þá ekki ágætt að halda þeirri aðferðafræði áfram og viðurkenna fúslega að við höfum ekki lengur efni á fortíðarþránni?

Kristín María Birgisdóttir

Oddviti Lista Grindvíkinga

Fyrir nýtt fólk í bæjarstjórn tekur það dálitla stund að átta sig á fyrirkomulagi og vinnubrögðum. Undirrituð tók sæti í bæjarstjórn fyrir hönd nýs lista sem bauð fram sl. vor. Lista Grindvíkinga. Við sem buðum fram undir merkjum óháðra vorum staðráðin í að gera þetta með öðrum hætti en verið hafði. Ekki að undra enda einkenndist kjörtímabilið á undan af sundrungu og á köflum persónulegum árásum milli bæjarfulltrúa. Meirihlutamyndanir það tímabil taldi jafnmargar og árin. Fjórar. En við ætlum ekki að dvelja lendur við það. Nýjir tímar voru boðaðir með nýjum vinnubrögðum. Hina hefðbundnu pólitík þar sem allt er vont sem kemur frá öðrum flokkum ætluðum við ekki að stunda. Við hétum því að styðja góð mál sama hvaðan þau kæmu.

Við, hinir kjörnu fulltrúar, höfum ekki alveg frjálsar heldur um það hvernig við kjósum að haga okkur né hvað við ákveðum að standa fyrir.  Málefnin leggjum við fram í kosningabaráttunni. Við þau skulum við reyna að standa eftir fremsta megni. Við hjá Lista Grindvíkinga vissum mæta vel að þetta kjörtímabil yrði ekki auðvelt. Við vissum að samvinna í bæjarstjórn væri það sem máli skipti. Við vorum líka meðvituð um hlutverk okkar að veita aðhald ef við yrðum í minnihluta. Þeirri vitneskju búum við ennþá yfir.

Það sem af er kjörtímabili hefur gengið vel. Við vorum ósammála um aðferðir í upphafi tímabilsins og okkur greindi t.d. á um það með hvaða hætti Hópsskóli og Grunnskóli Grindavíkur yrðu sameinaðir. Við mótmæltum kröftulega og bókuðum okkar tillögur. Það var ljóst strax í upphafi að meirihlutinn ætlaði sér að leyfa minnihlutanum að eiga aðkomu að öllum málum frá upphafi. Það byrjaði þegar við fengum að vera með í ferli bæjarstjóraráðningar frá upphafi til enda. Fleiri mál hafa komið upp þar sem hefð er fyrir því að meirihluti tækli. Við sátum alla fjárhagsáætlunargerðina og höfðum helling um hana að segja. Þar var komið til móts við kröfur minnihlutans. Í málefnum íþróttastyrkjanna var líka hlustað á skoðanir minnihlutans þegar kom að því að leiðrétta tölur sem röskuðust vegna golfsins. Ég hef áttað mig á því að núverandi vinnubrögð bæjarstjórnar eru til fyrirmyndar enda væri ótækt að róa öll í sitt hvora áttina þegar markmiðin eru þau sömu. Við veitum aðhald og ágreiningur er leystur á vettvangi bæjarstjórnar og bæjarráðs.

Árið 2011 er ekki auðvelt rekstrarlega frekar er hjá öðrum sveitarfélögum á landinu. Fólk er  eðlilega óhresst með niðurskurð þegar þannig árar. Í þeirri stofnun sem undirrituð starfar, Grunnskóla Grindavíkur,  þarf að skera niður um 25 milljónir. Fjölmargir eru ósáttir við þann niðurskurð og glósur  komið fram þar sem undrast er á þætti okkar kennara í bæjarstjórn í þeim niðurskurði. Ég sem kennari er ekki sérstaklega að huga að skólamálum umfram önnur í sveitarfélaginu bara af því að ég er kennari.  Mér er umhugað um öll mál bæjarins. Líka skólamál. Ég sit í bæjarstjórn sem fulltrúi alla bæjarbúa.

Grindavíkurbær er ekki bæjarfélag í skuldavanda. Við erum í rekstrarvanda. Tekjur okkar duga vart fyrir gjöldum og því var ekki með neinum hætti hægt að komast hjá því að fara í aðgerðir. Framlög ríkisins til sveitarfélaga hafa lækkað um 8000 milljónir á þessu ári. Það er gríðarlegur tekjumissir. Ríkið hefur sett sérstakar fjármálareglur sem sveitarfélögum ber að fara eftir. Róðurinn fyrir árið 2011 verður öllum sveitarfélögum í landinu þungur. Eftir þetta ár vonumst við til þess að ástandið fari að lagast.

Framlög til fræðslu- og uppeldismála er langstærsti hlutinn í fjármálum bæjarins. Þessi framlög eru nær allar útsvarstekjur okkar. Það var viðbúið að þegar þurfti að fara í niðurskurð þá þurfti líka að taka af þeim framlögum sem farið hafa í skólamálin. Gert er ráð fyrir að kennslustundir pr/nem verði þær sömu og voru skólaárið 2008-2009. Síðstu tvö ár voru kennslustundir pr/nem mun hærri en árin þar á undan. Þá finnst mér líka mikilvægt að horfa til þess að nemendum hefur fækkað og því eðlilegt að mínu mati að fjárframlög séu í takt við það.

Ég skil þau rök sem komið hafa fram að verið sé að skera niður á röngum stöðum, við séum að byrja á röngum enda. Stjórnsýsluna þurfi líka að skera niður. Það var farið í aðgerðir þar líka. Allir styrkir vegna aksturs voru teknir út en sú upphæð hljóp á fleiri fleiri milljónum. Bæjarfulltrúar skáru niður laun sín og bæjarstjóri var verulega lækkaður í launum.  Áfram verður haldið þar og erum við að vinna í því að sameina nefndir og leita leiða til að hagræða á þann veg að ekki sé verið að henda krónunni og hirða aurinn. Þá vil ég líka taka það fram að við getum gert breytingar í stjórnsýslunni á þessu ári sem taka gildi í ágúst á sama tíma og  breytingar taka gildi í skólanum. Ákvörðun um skólann varð að taka fyrir árslok 2010.

Margar þær aðgerðir sem farið hefur verið í t.d. á leikskólum eru aðgerðir sem stjórnendur þeirra stofnana lögðu til að yrði gripið til. Strax í haust fengu allir forstöðumenn þau skilaboð að hagræða þyrfti í rekstri, helst um 5%. Sumir voru komnir inn að beini og höfðu minna svigrúm en aðrir.

Minnihlutinn tók, eins og áður segir,  fullan þátt í þeirri fjárhagsáætlun sem unnin var í bæjarstjórn. Okkar sjónarmið skiptu máli og við höfðum öll áhrif á það sem gert var. Mér finnst mikilvægt að það komi fram, sérstaklega í ljósi þess að við kennarar sem sitjum í bæjarstjórn höfum verið dregin inn í umræðuna eins og okkur sé alveg sama um skólann okkar. Hægræðing í skólanum átti að vera töluvert meiri en raunin varð. Þar fór m.a. undirrituð fram og krafðist þess að dregið yrði  úr þeim niðurskurði. Ekki eingöngu vegna þess að ég hugsaði málið út frá  sjálfri mér sem kennara, heldur vegna þess að ég taldi farið allt of nærri þolmörkum skólans út frá minni þekkingu á skólakerfinu þessi þrjú ár sem ég hef starfað við Grunnskóla Grindavíkur.

Frá árinu 2008 hefur kostnaður í fræðslumálin aukist úr  rúmum 730 milljónum  í rúmar 955 milljónir þetta er aukning upp á rúmar 225 milljónir. Auðvitað hefur opnun nýs skóla þar helling að segja.  Áætlaður niðurskurður í Grunnskólanum milli 2010 og 2011 eru um 25 milljónir.

Mér finnst mikilvægt að koma inn á hitaveitusjóðinn í lokin.  Umræðan um þá peninga  er eðlilega sífellt  að skjóta upp kollinum í fjárhagsumræðunni. Sjóðurinn er núna kominn úr rúmum 4 milljörðum niður í um 2,9. Mér finnst mjög óábyrgt að ætla að eyða þessum peningum einfaldlega vegna þess að við getum ekki náð tökum á hallarekstrinum. Það að segja að við séum ekki að nýta þessa peninga er bull. Við erum að fá hundruði milljóna ár hvert inn í okkar rekstur vegna ávöxtunar (sem auðvitað hefur lækkað frá því í góðærinu). Ef ég ætla að fara að styðja það að  dæla þessum peningum inn í reksturinn af því að það er sárt að skera niður þá finnst mér ég algjörlega hafa brugðist sem bæjarfulltrúi. Sem fulltrúi allra bæjarbúa.

Ef þessara peninga hefði ekki notið við í ár værum við yfir 200 milljónir í halla og sú tala skiptir máli þegar litið er yfir rekstur bæjarins. Mér finnst það skylda okkar að fara vel með þessa peninga og reyna að búa í haginn þannig að komandi kynslóðir geti líka notið góðs af þeim.

Góðar kveðjur,

Kristín María

Oddviti Lista Grindvíkinga